Najmanje 40 migranata utopilo se jučer kada je potonuo njihov brod u Sredozemnom moru na putu ka Italiji, a tri osobe su spasene, rekli su zvaničnici UN i Tunisa.
Obalska straža Tunisa do sada je pronašla 21 tijelo. Među nastradalima je najmanje jedno dijete. Sve žrtve su afrički migranti.
“Brod je potonuo tokom putovanja koje je počelo sinoć iz mjesta Sfaks. Obalska straža izvukla je za sada 21 tijelo, a potraga se nastavlja”, rekao je Muard Mehri, direktor civilne zaštite Tunisa.
Međunarodna agencija za migracije i UNHCR saopštila je da ovakva tragedija ukazuje na potrebu jačanja operacija potrage i spasavanja u centralnom Sredozemlju.
Isti izvori navode da je oko 290 ljudi nastradalo u takvim brodolomima ove godine.
Obala nedaleko od Sfaksa postala je glavno mjesto isplovljavanja za migrante koji bježe od siromaštva i sukoba u Africi i na Bliskom istoku i traže bolji život u Evropi.
Prošlog mjeseca utopilo se 39 migranata.